閒話休提,言歸正傳。話說上個月立法會完成最低工資立法,而專責討論最低工資水平嘅臨時最低工資委員會尋日宣布,已就首個最低工資水平達成共識,稍後會將報告呈交特首。
委員會唔肯透露佢哋建議嘅最低工資係幾多。不過坊間有傳言話,最低時薪係貼近二十八元。如果此言屬實,政府又接受建議嘅話,就講明當局喺度搞折中,將資方同勞方提出嘅數字加起嚟除二。
咁樣做,好似面面俱到,既照顧咗勞方,又照顧咗資方,應該皆大歡喜啦。如果你真係咁諗就錯嘞,呢啲只係政府一廂情願咋,勞資雙方肯唔肯接受仲未知。
嗱,尋日有工會領袖堅持最低工資應該定為三十三元,話咁先至係最合理水平。佢仲話,三十三元僅僅好過綜援,令打工仔可以勉強養家咋。有人講得更決絕,話最低時薪唔夠三十五元,打工仔就要飲粥水咁話。照咁睇,勞工界一定企硬,冇「三字頭」都唔會收貨。
咁點算呀?睇嚟要資方接受三十三元方案,係冇可能o架嘞,政府惟有另想辦法。聽講,政府會考慮將邊遠地區交通費支援計劃嘅受惠範圍擴大到全港。受惠人士每個月可以領取六百元交通津貼,以每月工作二十六日、每日八粒鐘計,平均每粒鐘二元八,加埋最低時薪二十八元,啱啱可以滿足勞工界要求嘅「三字頭」。哈哈,咁嘅縮數都畀佢諗得到!不過,數係咁計,勞工界收唔收貨就唔知嘞。
千祈唔好以為搞掂勞工界就一天都光晒噃。嗱,好多工商界人士一聽講最低時薪訂為二十八元就牙痛咁聲,有飲食業老闆講到明,如果政府真係接納呢個水平,唔排除會大幅加價咁話。
講到加價,打工仔就媽媽聲,事關家陣樣樣都加,尤其係公用事業更係帶壞頭,加到離晒大譜,隧道加完巴士又加,渡海小輪加咗電車又加,如果飲食業再大幅加價,勢必帶動各行各業嘅加風,打工仔就慘咯。咁搞法,勞工界更加唔會讓步啦。
唉,公說公有理,婆說婆有理,睇嚟呢場爭拗唔會咁快結束,政府順得哥情失嫂意,仲有排頭痕,鬼叫你係弱勢政府咩!叮!