早前立法會通過政改方案，關鍵一步係白鴿黨同中央政府喺談判過程中各讓一步，諗番轉頭，立法會前議員劉千石喺○四年倡議「大和解」論，都算有先見之明，如果歷史時序稍為更改，○八年立法會選舉喺今年九月先至進行，九龍西嘅戰果隨時改寫。
自九龍西連任失敗後，阿石已經淡出咗政壇，鮮有公開露面，尤其佢選舉後自爆直腸癌復發，令人更關心佢嘅近況。臨時最低工資委員會尋日見記者，交代已就首個最低工資水平達成共識，身兼委員嘅阿石都有出席，只見久違嘅佢精神飽滿，神采更勝往昔。
信教嘅阿石話多謝上帝祝福，一切平安順利，平日除穿梭香港同上海醫病，亦會去廣州聽粵曲同唱戲，生活充實。阿石六年前倡議泛民同中央「大和解」，當時被以白鴿黨為首嘅泛民猛烈抨擊，政改方案通過後，社民連「長毛」梁國雄就要求白鴿黨還阿石一個公道。
阿石尋日提起「平反」一事，佢就哈哈笑咗幾聲，仲話：「一切順其自然啦。」