身為東道主嘅賴幸媛先上台致詞，由香港電影《十月圍城》中孫中山喺香港密謀革命嘅事迹講起，將香港同台灣嘅感情線連結起嚟，再縱述過去一百年台港關係嘅曲折發展。最有趣嘅係，賴幸媛喺致詞尾聲，綿裏藏針，插上一段介紹台灣官方喺過去一年，為利便台港民間交流所作過嘅努力同具體措施，然後，話對聯席會議「有着深切的期許」，明寸港府翹埋雙手乜都唔做，曲線催逼港府「起錨」做嘢。大家估吓鬍鬚曾有乜反應？就係：冇反應！佢上台笑笑口，一字一句讀完手上嘅官腔致詞就收工，都唔知佢到底係唔識點反應，定係懵盛盛到連人家寸緊佢都聽唔出？港台兩地高官碰頭，即高下立見。

鬍鬚曾喺聯席會議後嘅簡布會上，竟然喺大批台灣傳媒面前，以廣東話讀開場白，跟住全程九成時間都係回答香港傳媒提問，單聲道廣東話交流，聽到班台灣傳媒一頭霧水，簡直係促進港台交流嘅反面教材。