話說有人喺facebook上面貼出一張社民連前日參加悼念馬尼拉屠殺事件遊行嘅相，相中有社民連內務副主席吳文遠、季詩傑同財政彭義恍。一張咁嘅相本來冇特別，但問題出喺曾經自爆做過陪酒小姐嘅「大專2012」周澄，佢嘅側面亦都喺相中出現，任亮憲睇到即時發難話：「又係呢個combination（組合），似乎唔使加入社民連都可以成為『核心』，唔怪得知外面同傳媒都有咁多料！」

任亮憲咁講，擺明係衝住周澄唔加入社民連，仲將黨中秘密通街唱啫。一向唔妥任亮憲嘅季詩傑反擊，話佢哋一向好包容任亮憲「口快過腦」嘅性格。任亮憲當然唔會忍，反寸曾承認酒後胡言嘅季詩傑：「口不擇言、酒後亂噏者才是『個口快過個腦』。」周澄對任亮憲都好唔滿意，直指嗰個係「看圖作文遊戲」。可能因為有爭拗，將相喺夜晚就刪除咗嘞！都未到區議會選舉對外開戰，社民連幾個力捧嘅新星就同室操戈，睇嚟社民連內亂陸續有嚟。