行政會議成員兼泌尿科名醫「金刀梁」梁智鴻獲頒本年度大紫荊勳銜，授勳典禮十月先舉行，逾二百位醫學界好友尋晚率先設宴慶祝，籌委會主席兼骨科名醫高永文專登訂造一個揸住把金刀嘅八吋高Q版梁智鴻公仔賀佢。金刀梁趁機吐真情：「我之所以能夠高瞻遠矚，係因為有在座你哋各位一直支持我。」博得全場掌聲。
高醫生笑言金刀梁獲授勳消息出街後，幾乎晚晚有老友請食飯，為免佢冷落嬌妻，倒不如一次過慶祝。成班名醫仲夾份送咗部最潮嘅iPad賀金刀梁，而梁太馮令儀好有心思，親手自製三百五十份四葉草鎖匙扣答謝賓客。
民政事務局前常秘媽打李麗娟係金刀梁夫婦多年嘅老友，仲話梁太係佢救命恩人。話說九六年發生八仙嶺大火後，媽打突然感到胃痛，高醫生深知不妙，提議佢入瑪麗醫院檢查，幫佢做掃描嘅醫生，就係瑪麗放射科部門主管梁太。一照之下，發現媽打原來生咗個八厘米大嘅腎上腺瘤，及時做手術救回一命。
媽打話個瘤好難照，少啲經驗都唔得，幸好遇到梁太出手，所以尋晚除咗嚟賀金刀梁獲授勳，都要再三多謝恩人一聲喎。