樓價高企青年難上車

香港貧富懸殊愈來愈嚴重，好多人仲係無殼蝸牛，年輕一代就更加唔使講，唔係要「蝸居」，就係儲極都儲唔夠錢「上車」，難怪各大政黨都炮轟政府房屋政策失誤，仲強烈要求政府復建居屋添！唔好睇馬會主席阿John陳祖澤官運亨通，原來佢後生時上車都唔易㗎。

即將卸任馬會主席嘅阿John尋日同傳媒茶敍。大家除咗關注馬會之後嘅運作外，仲問佢點睇依家嘅樓市，佢笑言自己唔識睇，仲話自己一生做完公務員後，就去咗九巴做「巴士佬」，樓市同佢一直都冇乜關係喎。不過，講到依家年輕人置業難嘅問題，佢都深表認同，因為香港嘅樓價一直都高，仲話喺佢嗰個年代，月入千幾蚊，要買入四、五萬蚊嘅樓一樣係咁難。

阿John把口就咁講，但轉個頭又自爆喺一九六四年打第一份工，打咗三年工已經買咗樓，仲要係位於窩打老道山、有成千二呎嘅豪宅。嘩！首次置業就買豪宅、住大屋，依家晒命咩？

睇準暴動老爸叫撈貨

咁又唔係。佢話當年爸爸好有眼光，睇準六七暴動「樓市跌到散晒」之時，借咗筆首期畀佢買入呢層當年要七萬蚊嘅單位，而每個月佢幾乎用晒成份糧去供樓。唔知係咪感同身受嘅關係呢，佢似乎好鼓勵屋企人幫年輕人置業，亦都支持復建居屋，仲話年輕人要上車，一定要由低做起！

縱橫政商界咁多年，今次已經係阿John第三次退休嘞，佢直言，依家仲係四間上市公司兼三間非上市公司嘅非執行董事，而且仲有多個公職喺身，嚟緊更會繼續入馬場，堅持自己愛好，所以佢「生活不愁寂寞」喎！

對於嚟緊特首「跑馬仔」呢啲咁敏感嘅賽事，佢就似乎冇大興趣嘞，只係話英雄莫問出處，有冇做過公務員、識唔識房地產唔緊要，最重要係對政府熟悉、有辦事能力，有心服務香港就得喇喎！