壹淫媒旗下台灣爛果報二○○七年六月二十三日報道，指高雄某美語補習班一名男教師強迫女童口交，仲配埋性侵犯動作嘅繪圖。高雄地檢介入調查，結果發現根本冇咁嘅事，報道完全失實，裁定對男教師不起訴。

無情白事畀人屈，男教師夫婦舊年對台灣爛果報同撰稿嘅記者提出民事告訴，要求賠償一百五十萬元新台幣。高雄地方法院一審判爛果報敗訴，要賠償八十萬，教師夫婦不服，繼續上訴。爛果報居然亦提出上訴。本月十八日，高等法院高雄分院二審判決，爛果報應賠償男教師一百萬，佢妻子亦獲賠四十萬。爛果報合共要賠償一百四十萬。

查實，爛果報喺台灣早已經臭晒。因為成日生安白造作假新聞老屈畀人告，打輸官司不知幾多次。

仲有呀，今年一月，台灣爛果報因為老作，話高雄一家寺廟嘅放生魚畀慣犯偷釣食用，被廟方怒斥「顛倒是非、傷害廟譽」，全台六十四間廟宇聯手共同譴責爛果報。

叮！爛果報喺台灣唔止搞到名流富豪唔安樂，普通無辜百姓亦唔放過，甚至連佛門清淨地都要搞到不得安寧。正一係神憎鬼厭，佛都有火。

講真，呢啲陰招香港人早已經深受其害嘞。壹淫媒喺香港違反《淫褻及不雅物品管制條例》過百次咁多，連最嚴重嘅三級淫褻罪都犯埋。總之唔理真定假，愈淫愈啱，愈鹹濕愈快樂。

香港靠鹹濕，台灣靠老屈，淫賤黎嫌誨淫誨盜都未夠癮，要玩埋誨賭添。呢，香港水警今年六月初截獲大批準備偷運入內地嘅港產六合彩報《創富》。本報發現，《創富》連同另外兩份港產六合彩報《六合皇》、《貼士皇》經已靜靜雞轉咗承印人，但報刊註冊仍然維持原名。更奇嘅係，冇幾耐之後三份六合彩報刊登承印人突然變番同註冊資料一樣，即係淫賤黎擔任董事嘅一間公司。明明暗暗，兜兜轉轉無非想瞞天過海，渾水摸魚，繼續播毒神州大地啫。

地下六合彩肆虐內地，害到唔少同胞傾家蕩產、妻離子散，唔少人甚至連命都輸埋。近幾個月，廣州同中山已先後發生兩宗涉及受走私港產六合彩報荼毒，沉迷地下六合彩賭博而引起嘅命案。

彩禍唔根除，神州無寧日。上個禮拜五，東莞道滘多個部門就喺廣深高速公路一個出入口截住一架麵包車，查獲近萬份六合彩非法印刷品。呢啲就叫天網恢恢，疏而不漏嘞！

計太一叮話齋，壹淫媒刻意渲染暴力色情，危害港台，仲為內地地下六合彩賭博推波助瀾，為禍兩岸三地，早已天怒人怨。當年台北市長「郝青天」示範過大刑伺候，中港政府又會唔會祭出狗頭鍘為民除害呢？