為咗留港處理香港旅行團浴血菲律賓事件，煲呔曾臨時缺席喺福州舉行嘅「第六屆泛珠三角區域合作與發展高層論壇」，政制及內地事務局局長「林公公」林瑞麟被迫頂硬上出席論壇。
佢前日出席完論壇後畀記者捉住，問到銀行涉嫌轉移資料去其他合作機構件事之外，仲有人問到佢喺國家「十二五規劃」之中有乜貢獻、香港同深圳點樣合作開發前海、香港有乜優惠可以吸引內地台商去香港上市、郵輪經濟同郵輪碼頭發展、福建同香港嘅具體合作設想同建議等。
呢啲問題既技術性，涉及範疇又廣，林公公唔覺意答錯盞貽笑大方，但估唔到佢唔只答到，仲提供好多數字添。有「人肉錄音機」之稱嘅林公公今次冇失禮，有理由相信佢唔止播帶叻，背書都有番咁上下。