本身係觀塘聯合醫院精神科顧問醫生嘅潘佩璆,兩個仔已經出晒身,大仔仲就快做爸爸。潘醫生首次做爺爺,近日心情緊張到爆,尋日話緊張過當年做老竇,雖然個孫未出世,但都成日想望吓新抱個肚,為免身懷六甲嘅大肚新抱長途跋涉去佢喺粉嶺嘅屋企,依家潘醫生一個禮拜同太太出旺角三、四晚,同阿仔、新抱食晚飯,認真廿四孝老爺。
踏入十月亦係佢同太太結婚三十周年,咁咪即係雙喜臨門囉!佢話一於夾埋乖孫嘅滿月酒嚟大搞,請晒班親戚出席高興吓。