鍾偉平入行三十五年，憑自己努力，由紅褲子搖身一變成為上市公司主席，佢嘅成功故事係一個香港精神嘅樣辦。即使成為億萬富豪，佢嘅心態都好平實，佢話：「講心嗰句，現實生活係晏晝食大家樂叉燒飯，有時夜晚都係。」不過有時想轉吓口味，佢必定去灣仔樂意扒房（Louis' Steak House）鋸肉眼扒或西冷扒，幫襯逾二十年都唔厭。咁啱香港奧委會副會長劉掌珠聽到佢咁講，仲好興奮咁加入話題，原來佢都係樂意擁躉。

樂意由楊家三兄弟打理，負責廚房嘅William話，鍾先生最鍾意食十二安士靚牛扒，厚燒零舍多汁。佢哋嘅牛肉嚟自美國內布拉斯加州，肉質一流，所以唔使落任何醬汁，只需灑啲靚海鹽就夠晒味嘞！