做得香港橋牌協會名譽會長嘅中國金融租賃集團主席蔡國雄，當然對呢種智力牌局好着迷，佢已經打咗四十五年橋牌喇！蔡老闆早前又慷慨贊助名人橋牌邀請賽，見佢戴住一隻錶面好似啤牌圖案嘅陀飛輪錶滿場飛，原來隻錶係佢自己設計，再搵瑞士錶廠St. Gallen度身訂造，全球獨一無二㗎！
蔡老闆話隻錶嘅錶芯嚟自國產名牌錶廠天津海鷗，由於國產陀飛輪仲未達到瑞士頂尖品牌嘅水準，所以特登送到瑞士錶廠將時間嘅準確性調校到世界級。至於用貝母做成嘅錶面係隻錶嘅靈魂，事關個圖案似足啤牌，襯晒蔡老闆喜愛橋牌呢個嗜好。
呢隻內外在美兼備嘅靚錶要幾錢呢？佢好鬼馬咁笑住話：「只要五萬蚊，平到你唔信！」梗係啦！負責幫佢製造嘅瑞士錶廠St. Gallen嘅老細係佢老友龍家祥嘛！龍家祥仲話蔡老闆係愛錶之人，梗要支持佢。