扮嘢文一九八八年喺蘭桂坊首先購入加樂大廈，隨即引入各式各樣嘅食肆、酒吧、俱樂部，令呢度漸漸旺起嚟。後來佢喺一九九二年買埋旁邊嘅加州大廈，自此呢兩座大廈漸漸成為蘭桂坊嘅地標，但呢兩幢「蒲友」勝地即將拆卸重建，扮嘢文打算將兩幢大廈合而為一，起一幢二十五層高嘅全新地標式建築物，當中十四層做食肆，其他樓層就做寫字樓。

佢話會租出部分飲食樓層，自己亦會營運幾間，但因顧客口味經常轉變，所以暫時未諗到會做邊一類餐廳。佢好細心，話所有飲食樓層都會預留陽台或室外空間，等煙民可以喺唔影響其他人嘅情況下食煙。

兩幢大廈係佢嘅發迹地，依家要拆有冇乜感想呢？佢承認對呢兩幢物業充滿感情，但因為加州、加樂兩幢大廈都開始舊，為咗加強競爭力，今次不得不重建。佢話依家香港娛樂場所面對嚟自世界各地嘅競爭，以內地為例，娛樂場所裝修美輪美奐，為咗令蘭桂坊保持娛樂勝地嘅龍頭地位，今次工程非做不可。

咁新大廈改咗名未？佢話未咁快，但好有信心呢幢建築物可以再次成為蘭桂坊嘅地標，總之不辱「蘭桂坊之父」美名！