相信大家都見到財爺鬍鬚曾前日抵達台灣時，孭住個袋行出嚟同台灣方面接機嘅人員握手，嗰個款真係好搞笑，簡直當正自己去旅行咁，真係有啲失禮。唔知係咪近朱者赤，近墨者黑，連做「跟得夫人」嘅曾太黃蓮華都係咁失禮。
曾太閃人冇交帶
話說鬍鬚曾尋日展開訪台第二日行程，首站參觀有台灣文化地標之稱嘅誠品書店，誠品董事長吳清友致辭完畢，大會宣布由吳董送上紀念品畀曾太，但係成場人等咗好耐，都唔見曾太上台。
原來曾太未等到吳董致辭結束，唔等主人家講完嘢就走咗去，又冇向大會交代，所以釀成尷尬場面。雖然最後由商務及經濟發展局局長劉吳惠蘭上台代領紀念品，但已令吳董無端端食檸檬。
在場有人揣測曾太可能去咗洗手間，又或者係去咗買嘢，但無論係邊樣都係失禮人前。其實，吳董送嗰份紀念品外形似茶葉，而台灣出名嘅茶葉係凍頂烏龍，真係襯晒咁烏龍嘅曾太！
佢老公亦唔好得去邊。吳董喺致辭時向鬍鬚曾訴衷情，指誠品書店想喺香港開枝散葉，中環、銅鑼灣同九龍區都係心水地點，只可惜香港租金太貴，希望獲港府協助，但港府一直冇任何承諾，誠品只好「一切隨緣」咁話！
現場再蠢嘅人都聽得出，吳董想鬍鬚曾識做幫幫手，但係緊接上台發言嘅鬍鬚曾，完全唔識反應，令吳董當場無癮。其實誠品想喺香港開店，都唔係第一次提出，鬍鬚曾到訪又冇準備伸出友誼之手，咪即係運桔？
灌溉之旅似趕客
其後，佢安排參觀書店時，被記者追問誠品想來港開店問題，佢答：「好呀，很好，好歡迎。」佢好可能自知失儀，下晝參觀故宮時補飛指會研究有乜幫到手，又話對港台免簽證呢類有益兩地嘅事，港府會考慮。
鬍鬚曾以港台經濟文化合作協進會榮譽主席訪台，任務就係促進港台經貿，佢仲形容今次係「灌溉之旅」，但以佢尋日嘅表現，似去台灣趕客多於招商喎！
鬍鬚曾對誠品來港開業愛理不理，佢老婆對主人家嘅招待一樣漫不經心，睇嚟真係夫唱婦隨喎！