有人擔心，可能有部分遊行人士情緒激動，做出過激行為。有菲律賓官員甚至話，希望香港人唔好將怒火發洩於喺香港工作及生活嘅菲人身上。

計太一叮話齋，呢種憂慮純屬多餘，香港人唔似菲律賓警察咁低能，唔似菲律賓政府咁冷血，亦唔似菲律賓總統咁涼薄，香港人講道理、愛和平，任何遊行都以和平進行，更加唔會遷怒無辜嘅菲律賓人。

講起菲律賓警察，真係廢到冇朋友。事發當日，幾十人圍住架巴士，攞住爛鬼錘仔敲敲打打，都唔知佢哋究竟救人抑或害人。經此一役，菲律賓警察臭名遠揚，有人話，菲律賓特警部隊SWAT嘅全寫係Sorry We Aren't Trained，喺香港，「菲律賓警察」已經成為潮語，用嚟形容廢柴、無能、退縮、懦弱。

奇怪嘅係，菲律賓警察攻入巴士都要用成粒鐘，但交代遇難者死因，又忽然變得好有效率，調查工作仲未完成，佢哋就聲稱死者全部死於兇徒槍下。問題係，其中三位死者運返香港驗屍，驗屍工作尋日先至完成，菲律賓警察點可能咁快得出結論？唔通佢哋有未驗先知嘅本事？唔怪得港人對菲律賓當局嘅調查完全冇信心，老實講，旨意佢哋公正客觀調查事件，等於相信豬乸會上樹，叮！

講到底，香港人嘅悲憤，既係由於同胞枉死，更係因為菲律賓政府無能兼涼薄。最匪夷所思嘅係，屠夫門多薩出殯時竟然着住警服，棺木冚上菲律賓國旗，搞到好似國葬咁，直到中國駐馬尼拉大使館出聲抗議，菲律賓當局先至知衰，急急搵人移走國旗，話冚國旗係家屬嘅個人行為喎。

大家都知，冚國旗係一個國家嘅最高規格葬禮，只有英雄同有崇高地位嘅人先至可能享有呢種榮耀。菲律賓屠夫冚國旗，即係喺香港人傷口撒鹽，是可忍孰不可忍也！

其實，要睇菲律賓政府有冇誠意，只要睇吓嗰個九唔搭八嘅所謂總統就知。慘劇發生後，呢位三世祖態度輕佻，一邊道歉，一邊笑口淫淫，佢仲話微笑係表達憤怒喎，簡直當所有人都好似佢咁白癡。所以話，佢聲稱三星期內會提交慘案調查報告，你信唔信吖？叮！

一句講晒，菲律賓政府係靠唔住嘅，徹查真相惟有靠自己。港府表示會透過合作機制向菲律賓索取慘案資料，警方亦已派出多名警員到菲律賓調查。做就做得啱喇，但一定要貫徹到底，千祈唔好虎頭蛇尾呀！