基督教團體「全城更新」尋日喺中環遮打花園，為馬尼拉人質事件嘅死難者舉行大型追思會，主席王培琪（Linda）出動一家人，喺兩日內搞掂呢個咁大型嘅活動，奔走最落力嘅梗係身為中策集團主席嘅老公馬時亨啦，佢哋兩夫婦同大女馬露明尋日都幫手接待參加者。尋日天文台一度發出黃色暴雨警告，但到三點卻突然雨過天青，與會者都覺得好神奇。
尋日到場嘅官員同名人好多，煲呔曾夫婦喺追思會逗留咗一個鐘，官員有運輸及房屋局局長鄭汝樺、民政事務局副局長許曉暉、食物及衞生局副局長梁卓偉、立法會議員林健鋒同梁劉柔芬等，其他仲有醫管局主席胡定旭、香港旅遊業議會總幹事董耀中等。
慘劇突然發生，肥亨喺三日後、即上禮拜四朝早開始策劃，落實方案後再向政府部門申請，好彩政府好幫手，當日下晝已成功取得場地同集會批文，夜晚再急忙安排翌日喺報章刊登廣告，到前日（禮拜五）就安排出席者名單同活動程序，好彩得各方好友幫忙。肥亨特別提到，今次請到殯儀業老行尊蕭志成幫手，以特惠價三千蚊幫手布置鮮花，令成個場地相當莊嚴。
慘劇事發後，好多人都話唔會再去菲律賓，但肥亨同愛女露明異口同聲話，如果神要安排佢去菲國傳道同分享福音，相信神會祝福佢，唔使擔心！