本文重點
政改一役後，白鴿黨因為同中央談判，被激進派批評出賣民主，有人即刻退黨以示不滿。正所謂「有人辭官歸故里，有人漏夜趕科場」，尋日白鴿黨高調舉行迎新會，副主席單仲偕（單雞）話政改前後有二十一人遞表入黨，包括內地前工運領袖韓東方、投資銀行家張雄峰、立法會議員黃成智公子黃文軒，仲有個前社民連成員添，佢哋仲一次過晒冷介紹一眾新秀。
搞社區藝術吸引年輕人
單雞話，依家白鴿黨有七百六十幾個黨員，人數創近年新高，佢對未來壯大白鴿黨非常有信心，目標係半年內黨員人數突破一千大關。咁點吸引人入黨呢？白鴿黨已經有幾個大計，首先從宣傳入手。除咗靠本身黨員去呼籲人入黨，白鴿黨仲計劃透過搞社區藝術，吸引多啲年輕人參加黨活動，順便睇吓可唔可以吸人入黨。
佢哋仲會改革青年事務委員會，成為直屬中委嘅「民主青年」，當中核心成員除主席外，非白鴿黨成員都可以入黨，相信會吸引一班對政黨反感嘅青少年加入。