香港旅行團浴血菲律賓令全城心情沉重。「扮嘢文」盛智文尋日出席蘭桂坊一個活動時，都話件事係可怕嘅悲劇，令人好悲傷同沉重，佢好擔心所有受影響嘅家庭同遺孤。講開菲律賓，扮嘢文原來早喺二十五年前曾經打算投資當地，仲開埋辦事處添，但當地社會同政局唔太穩定，最終佢都撤資走人，依家喺當地冇任何投資。
扮嘢文話，悲劇發生當日佢喺泰國布吉島，當地電視都有播放呢段消息，而佢喺悲劇發生第二日亦已返到香港，期間一直有留意事態發展。佢又話，今次港府處理手法唔錯，吸取咗當年遲遲唔派包機去泰國接香港人嘅教訓，不過，佢都希望呢種經驗以後唔使應用。
講番尋日嘅活動，蘭桂坊晚晚都有好多人去飲酒，每晚收集到嘅酒樽真係堆積如山，建仔同蘭桂坊協會聯同兩個環保團體，前晚喺蘭桂芳搞咗個玻璃樽回收行動，鼓勵餐廳酒吧主動回收玻璃樽，扮嘢文梗係響應啦！