港台關係要融冰，財政司司長鬍鬚曾尋日以港台經濟文化協進會榮譽主席身份首次訪問台灣，被視為官階最高嘅特區政府官員訪台行，隨訪嘅官員同本港傳媒陣容鼎盛，但台灣傳媒就當個訪問團好似透明咁，尋日只得兩個台灣記者去採訪港府訪問團抵台，以陸委會港澳處處長朱曦為首嘅接待團更只得五個人，場面真係夠晒冷清。
台灣傳媒行家竊竊私語話，鬍鬚曾又唔係特首，又唔係中央高官，預計唔會好似前兩年大陸海協會副會長張銘清訪台時咁畀人襲擊，民進黨尋日亦冇組織人到場示威，所以傳媒對佢嘅興趣唔大，加上鬍鬚曾唔少行程都係閉門進行，大家都諗住等到戲肉、即係協進會同台港經濟文化合作策進會舉行聯席會議先報道喎。
人哋冷待，鬍鬚曾都衰自閉，去到台灣，同記者講嘢全程用廣東話，好似當兩個台灣記者冇到咁，真係認真唔識做。更弊嘅係，港府遲遲唔肯定訪台行程，連台灣官員都私底下發牢騷，話鬍鬚曾好奇怪、好保守，直到起程前兩日先通知人哋，唔跟「客隨主便」嘅傳統，連聽日見陸委會主委賴幸媛、後日見台灣行政院長吳敦義，都唔肯確認見面時間，搞到官方同傳媒都麻煩。出門搞成咁，鬍鬚曾真係失禮人。