港為菲國第六大客源地

立法會嚟緊禮拜四（九月二號）就會開特別大會跟進，政府對當地發出黑色旅遊警示預料係討論焦點之一，有議員支持黑色旅警生效至菲國完成慘案調查為止，不過，旅遊界嘅謝偉俊（Paul）就話，理解市民想杯葛去菲國旅遊，但旅遊警示係有清晰意義嘅旅遊監察機制，用呢種機制懲罰菲律賓並唔係最佳方法。

立法會跨黨派今日會發起大遊行悼念人質事件死難者，唔少黨派同功能界別議員都會出席，日前，多名立法會議員都喺立法會特別保安事務委員會上，撐港府應該維持黑色旅警至菲國政府完成調查為止，香港係菲律賓旅遊業嘅第六大客源地，呢一招嘅殺傷力好大。

今日會由內地趕返香港出席遊行嘅阿Paul話，唔反對市民杯葛去菲律賓，但唔支持用政府對菲律賓發出黑色旅警呢種方法，佢早前亦向保安局副局長黎棟國反映過。佢話，黑色旅警可能影響一啲因公務或商務去當地嘅人士購買保險同保險範圍，而且將旅遊監察機制當成懲罰措施並唔理性，尤其港府依家只向菲律賓一個國家發出黑色旅警，係咪表示菲律賓最危險呢？

工聯會唔評論杯葛事宜

匯賢智庫嘅葉劉淑儀同公文袋嘅余若薇，都支持發出黑色旅警。工聯會嘅葉偉明就話，工聯會仲未討論禮拜四大會嘅立場，所以暫時唔評論杯葛一事。

葉偉明又話，日前喺保安事務委員會上好激，皆因自己好氣憤，希望港府盡快派警員參與調查，煲呔曾前晚宣布已經增派警員去菲律賓調查，可算一種交代。