呢嗱，粉嶺一位六歲女童，尋日朝早獨留在家，瞓醒後周圍搵媽咪，爬上廚房垃圾桶探頭窗外，失足由三十七樓墮下。期間女童曾用雙手抓住三十三樓嘅晾衫架，半天吊嗌救命，最終體力不支跌落一樓平台身亡。女童媽咪買餸返嚟得知意外，情緒激動大嗌：「點解搞成咁o架？」喪女之痛難平復，仲隨時可能因為「疏忽照顧兒童」被檢控，簡直係慘劇中嘅慘劇。

呢次已經係本港半個月內第二次發生獨留兒童在家墮樓意外。八月中，荃灣福來邨一位五歲男童扭計唔肯跟媽媽出街，被獨留喺屋企，其後爬上未鎖好窗花嘅窗望街尋母，失去重心由三樓跌落街，傷重命危。

類似慘劇近幾個月一再發生，五月底，香港仔一名三歲男童趁外婆唔覺意，偷偷走到後樓梯玩，由十八樓氣窗直墮四樓平台，送院搶救後不治。

慘劇皆因睇少眼，小朋友好奇心重，又毫無安全意識，一離開大人視線範圍就好容易出事。而且根據法例，任何人忽略照顧兒童，令兒童可能受到不必要嘅苦楚或傷害即屬違法，可被控以「疏忽照顧兒童」，一經定罪，最高可被判監禁十年。

血的教訓歷歷在目，點解家長仲咁麻痹大意呢？正如防止虐待兒童機構負責人話齋，深化教育、提高家長家居安全意識，政府責無旁貸。所以話：「點解搞成咁o架？」更應該問吓政府。

叮！提起呢個無能政府，太一叮直頭火都嚟埋。除咗家居安全宣傳不足之外，對家長尤其係為兩餐要早出晚歸嘅低下階層父母，實質性支援幾乎等於零。

有社福團體調查報告踢爆，由於受資助託管服務嚴重不足，未能協助低收入家庭減輕經濟負擔，今年暑假唔少學童一係焗住獨留屋企，一係就淪為街童。調查發現，受訪學校提供託管服務只得一成半，咁嘅比率對要返工搵食嘅家長，有幾多幫助吖？

社會福利署話就話有個社區保母計劃，但只為六歲或以下幼童提供服務，仲唔包括接送服務及功課輔導，做一半唔做一半，到頭來咪又係搵貧困家長嚟搞。唉！當局唔肯增加資源，私人託管服務郁吓每月幾千蚊，而且時間欠彈性，窮等人家咪惟有攞自己骨肉安危博一鋪囉。

有調查發現，七成受訪中小學生曾被獨留家中，約一成更係日日被獨留屋企。咁大嘅潛伏危機政府都扮盲詐睇唔到，計太一叮話齋，家居冇安全有陷阱，唔怪得次次評選「宜居城市」，香港都榜上無名啦。叮！