本港旅行團喺菲律賓遇槍手挾持，搞到好多人唔安樂，同菲律賓有密切關係嘅人更深有同感，港區全國人大代表蔡素玉講起當地治安，都話當地綁架案好猖獗。
蔡菜子嘅父母係菲律賓華僑，早前佢去咗西藏，星期一晚正喺當地，佢媽媽喺香港打電話畀佢，蔡菜子先知康泰旅行團喺菲律賓嘅慘痛經歷，一聽就鬧個唔停，佢仲話，菲律賓嘅綁架罪案好似「食生菜咁」，佢嘅親友之中，有家人或朋友曾被綁架嘅，就有十幾人之多。
佢仲話，去到菲律賓有三招自保。第一，一定唔搭的士，事關佢八、九十年代曾經喺菲國開展覽中介公司，公司兩名職員都試過搭的士時被洗劫，中招率係百分百，所以佢每次去菲律賓，都會叫世叔伯搵車接佢；第二，唔會單獨出街；第三，喺公眾地方，頸鏈、手鏈同戒指等貴重首飾，一律收起，財不露眼。