城中名人熱議菲律賓治安，原來本港親中陣營支柱之一嘅福建幫，十個有九個半同菲律賓都有淵源，福建幫「大佬」盧文端嘅先父係菲律賓華僑，佢每年都會帶齊一家大小去菲律賓掃墓，今年據聞有軍方朋友派咗架防彈嘅「賓士」房車保護佢。
盧文端話，菲國治安近年算係好番少少，以前仲差，佢喺菲國嘅堂細佬間大屋，試過兩次畀匪徒爆竊，失竊大量財物，之後要二十四小時搵警衞把守。亦有一個生意上嘅朋友被人綁架，家人交出贖金後，先至執番條命仔。佢禮拜一喺電視見到菲國警方救人相當唔專業，結果流血告終，覺得好悲痛，以後佢再去菲律賓，出入都會更小心、盡量低調，仲打算揀架殘舊啲嘅車嚟坐。
另一個福建大佬洪祖杭喺菲律賓嘅生意少過以前，幾年先至去一次，不過，每次去到保安工夫唔敢怠慢。佢喺菲律賓有自己一套防賊措施，好似唔去陌生地方，亦一定入住大酒店雲集嘅地區，事關治安好啲，但最穩陣嘅，都係請當地朋友幫手，請保鏢護身。有幾穩陣呀？有真槍壓陣嗰隻囉！