白鴿黨開闢陣地畀市民留言

康泰旅行團遊菲律賓遭槍手挾持、釀成本港幾十年來最慘烈血案，事件扯痛全港七百萬人的心，港人悲傷莫名，紛紛要求追究。多個政黨近日都先後出招，如唔少議員提前立即結束暑假，籌備開會追究，政黨亦因應好多市民透過互聯網表達哀思、發洩不滿，上演網絡戰，例如白鴿黨、建仔、公文袋同富貴黨都喺網頁做黑籤以示悼念，當中又以白鴿黨開闢陣地畀市民留言悼念，安排夠貼心，建仔亦都唔弱，其他政黨睇嚟都會急起直追，緊貼香港人嘅脈搏。

政黨係攻心嘅組織，同港人一齊呼吸，先可以爭取到選民支持。今次慘劇發生後，富貴黨第二日已經去菲律賓駐港總領事館抗議；建仔亦唔執輸，抗議行動之外，仲發起全港簽名要求菲律賓政府徹查事件，尋日佢哋又約見外交部駐港特派員公署官員要求畀本港執法人員參與調查，行政會議成員劉江華直頭好似事件嘅專責發言人咁。

社民連經濟動力網頁無動靜

政府喺facebook開設悼念網頁，白鴿黨都喺自己網頁開闢陣地畀市民寫低哀思，抒發感懷，佢哋嘅立法會議員張文光原本諗住外遊，但係菲律賓發生「黑色星期一」之後，佢話大半日睇住個電視，又激氣又擔心，依家心都噏埋，已經冇心機外遊，寧願留喺香港跟進工作。工聯會嘅葉偉明尋日都開始發功，旅遊界嘅謝偉俊同社民連嘅黃毓民更係事發後飛去菲律賓，立法會原本放緊暑假，但人質事件一出，啲議員自動腰斬假期做嘢。

尋日所見，白鴿、建仔、公文袋及富貴黨嘅網頁都套咗黑，反而過去善於打網絡戰嘅社民連網頁未見特別動靜；至於同富貴黨競爭激烈嘅經濟動力就到尋日為止都未見更新網頁，未見披露就事件有乜新動作，呢一仗輸咗半個身位喇！