陰功！以前嘅國學大師皓首窮經，都未至於咁早就讀盲眼；科學家成日困住做實驗，愛因斯坦七十幾歲依然眼仔碌碌伸脷扮鬼臉，為何小朋友未夠十歲就大近視？

幼童近視大激增，也許同現代資訊科技進步大有關係。如今嘅細路，小學階段已日日玩電腦，坦白講，用來上網學習搜集資料時候少，用來玩網上遊戲、睇吓過癮片段多，咁搞法唔近視有鬼咯！

筆者深感幼童大近視激增父母有責，事關良好生活習慣不從小養好，必定後患無窮。早前有調查指，港孩嬌生慣養個案激增，亦有所謂「直升機父母」，樣樣為子女排難解憂，搞到十四歲女唔識自己飲水。最弊多數父母以為仔女在家打機玩電腦，怎都好過出外瞎逛結交損友，於是打機、玩電腦玩到日月無光，近視大增，精神委靡不振。

內地曾有教育家說：「中國教育的解放必須從解放孩子的好奇心開始。」依筆者看，要培養學生有想像力、創造力，則必須從監控孩子的上網及打機開始，否則，嬌生慣養的小朋友，物質富裕而資訊爆炸，日日打機天天上網，搞到大近視，更容易變成「三低學生」：自理能力低、情緒智商低、抗逆能力低。

為了兒童的未來着想，為了拯救大近視幼童，筆者建議教育當局推行「無機日」，這日只讀印刷書不上網。