事關內地不法之徒大舉南下，移師本港做世界，呢，沙頭角荔枝窩已淪為佢哋嘅伐木場。

呢班友來港偷樹駕輕就熟，仲勁過當年嘅省港旗兵。佢哋每次都分兩日行動，第一日探路，太陽一落山就坐船過海，登陸後行入樹林，睇啱邊棵樹就畫個記號，再探明附近嘅保安情況就班師回朝。第二日至係戲肉，偷樹黨帶埋電鋸嚟，搵番打咗記號嘅土沉香樹，三兩下就鋸倒，然後成棵運番內地，一轉手就豬籠入水。

話時話，班友大模廝樣用電鋸斬樹，鬼殺咁嘈，唔怕畀人發現嘅咩，唔通嗰度真係無王管？本來法例規定，喺政府土地砍伐或者摧毀樹木係犯法行為，要被罰款同坐監。可惜警方懶懶閒，令法例形同虛設。

以地處邊境地帶嘅沙頭角荔枝窩為例，警方以前派過兩個警員駐守，點知唔夠兩個禮拜就撤走，從此進入「冇警時分」，陸警甚少由市區入嚟巡邏，水警更係關人個關，有人報警先至慢吞吞到場，隻賊船已經無影無蹤。於是乎荔枝窩變成無掩雞籠，偷樹黨如入無人之境，近排已經砍咗一百棵五十年樹齡嘅土沉香樹。

眼白白睇住香港嘅寶貝畀人偷走晒，市民點會唔急呀，有立法會議員要求警方制訂措施，保護土沉香樹。警方就話「會不時檢討」，講咗等於冇講。叮！

其實，珍貴樹木被偷砍已經唔係第一次，經常遭殃嘅係羅漢松。俗語話，家有羅漢松，一世唔使窮，可見呢種樹幾珍貴，香港本來有大量羅漢松，可惜政府唔識寶，令偷樹黨有機可乘，家陣全港得番唔夠三千棵。各界要求政府打擊偷樹黨，但政府根本冇耳裝。偷樹黨更係有恃無恐，又將魔爪伸向土沉香，如果警方再唔嗲唔吊，唔使幾耐，土沉香樹同羅漢松都會偷清光。

香港之所以叫做香港，係因為早年廣種兼運送土沉香樹，所以係「香的港口」。但家陣土沉香買少見少，香氣不再，香港想唔變臭港都幾難。叮！