全城為香港旅行團喺菲律賓被挾持最後以流血告終感到哀痛，更勾起工聯會立法會議員KK黃國健嘅深層恐懼。KK同我哋講，慘劇令佢諗起二十幾年前嘅不愉快經歷，諗起都好驚。
二十幾年前，KK仲係行緊船，因為工作關係經常要往返菲律賓。佢話以前菲律賓好多海盜出沒，所以一直對呢個國家嘅治安冇乜信心，有次仲遇上挾持疑雲。
佢記得當時同幾個行船同事喺馬尼拉市中心食完嘢，打算搭的士返碼頭，點知一上車就畀人用一支銀色左輪手槍指嚇。一開始以為嗰個菲律賓人想打劫，KK嚇到標冷汗，坐近另一邊車門嘅同事已經即刻開門逃生走為上着，但佢想走都走唔到！點解？唔係因為嚇到腳軟，而係佢啱啱夾咗係中間，進退不得。正當唔知點好之際，嗰個兇神惡煞嘅菲律賓人忽然用英文問佢需唔需要買槍，至明白呢個人其實係賣槍嘅。
KK拒絕咗呢單「生意」後立即走人，並再次確定菲律賓嘅治安實在太差，決定除咗公事之外，以後都唔會再去菲律賓！