留喺香港嘅其他黨派亦冇怠慢，富貴黨副主席張宇人前日第一時間發出新聞稿，對事件表示好震驚同難過，要求菲律賓當局解釋事件。另一黨副主席方剛同多名黨員亦到菲律賓駐港總領事館抗議。而該黨常委、身兼港區全國人大代表嘅田北辰，尋日列席全國人大常委會會議時發言，要求中央政府向菲律賓政府作出強烈譴責同跟進事件，田二少呢個發言更獲得席上嘅常委贊成。同樣身在北京嘅全國人大常委范徐麗泰則開腔要求菲律賓政府向港人作出合理解釋同交代。

經濟動力林健鋒尋日晏晝就拉埋旅遊業議會總幹事董耀中，直接向菲律賓駐港總領事柯明表達對事件遺憾，亦對菲警處理手法極度失望，要求菲律賓當局對事件追究到底，並將結果向公眾交代。

由廠商會代表林大輝牽頭嘅C18，今日更會喺《東方日報》刊登全版廣告譴責菲律賓政府，今朝早又會喺尖沙咀碼頭收集市民簽名，藉聯署要求菲律賓政府還死傷者一個公道，促請佢哋向死傷者作出補償。大輝仲狠批菲警嘅救人行動根本係謀殺行動，令港人無辜枉死，菲律賓總統處理得咁不堪，直頭係草菅人命。

白鴿黨同建仔尋日亦去咗菲律賓駐港總領事館抗議，而分別由建仔劉江華同白鴿黨涂謹申擔任正副主席嘅保安事務委員會，已鐵定聽日晏晝四點半召開兩個鐘嘅特別會議，跟進今次事件。

平時喺立法會各執一詞、乜都拗餐飽嘅各個黨派咁同仇敵愾，以唔同方法一齊為港人發聲，槍口一致對外，向菲律賓政府追究責任，睇嚟菲律賓政府不得不向公眾作出一個明確交代。