貴為上市公司揸Fit人嘅俊和發展集團主席Dominic彭一庭，並冇一般上市高層咁拘謹，反而言談風趣。日前見佢戴住Baume & Mercier名仕錶出席股東會，隻錶好特別，錶圈設計成十二邊形，感覺好硬淨，襯晒佢硬漢嘅形象。
Dominic謙稱隻錶好普通，有計時功能同日曆視窗，售價約兩萬零蚊，唔係好貴。佢鍾意隻錶夠重，唔易撞爛。其實B&M腕錶來頭一啲都唔簡單，已有一百八十年歷史。十二邊形嘅錶圈設計屬於B&M經典款式「Riviera」系列，黑魅色調配以鈦金屬設計，一直深受運動型男士喜愛。
Dominic今年三十七歲，但就要打理年紀大過佢嘅家族企業，少啲本事都唔得。不過佢早有準備，喺美國哥倫比亞大學主修經濟、政治同數學，仲攞埋紐約大學法學博士添！