身兼公開大學護理學系副教授嘅立法會衞生服務界議員Joseph李國麟，呢個暑假冇得抖，令佢醒起以前睇過一齣介紹妙法寺七日短期出家嘅紀錄片，充滿好奇心嘅佢躍躍欲試，猛咁讚「好好玩o架」，又如數家珍咁話，參加短期出家要每朝早四、五點起身，食完粥水或者稀飯嘅早餐後，就成班人一齊唸經，可以一嘗做和尚嘅滋味，可惜因為冇時間而冇參加。
Joseph講得興起之餘，亦對自己近年冇晒私人時間感到可惜。佢話自從做咗議員後，連見吓佢位喺那打素護理學院做院長嘅老婆都冇時間，有時甚至要靠邀請佢哋兩公婆出席活動嘅團體識趣，安排佢哋兩公婆坐埋一齊，至可以增加見面機會。
講到咁，佢似乎對做立法會議員意興闌珊咁噃，唔通下屆佢想退選？佢就話關於下屆參選與否，依家仲言之尚早。