肥亨憶述當晚坐低食飯時，順手拉一拉張木櫈，點知中指「攝」住咗唔郁得，原來係畀木櫈嘅罅隙卡住，肥亨用力一扯，中指就損咗，血流如注，都唔知應唔應該去醫院。

喺現場嘅行政會議成員兼名醫梁智鴻見狀，衝上前為肥亨止血，在場仲有著名心臟科醫生陳紀永，好彩肥亨傷勢唔嚴重，唔使縫針，但醫生們要佢豎起中指半粒鐘，否則難以止血，就算不雅都冇辦法。

佢身邊嘅朋友就起哄，話肥亨可以向酒店索償，律師朋友磨拳擦掌話幫手，兩位醫生朋友亦好搞鬼咁補多一句，話：「我哋可以做你嘅專家證人！」肥亨翌日已冇大礙，亦唔使再豎起中指做人，但醫生話隻手指仍然要包住兩個禮拜，唔准亂郁。