單雞高調東區插旗

嚟緊兩年相繼會有區議會同立法會選舉，各個政黨早就展開部署，現任議員就煩緊點樣可以冧莊，第二梯隊就出盡計仔博上位。選舉大戰一觸即發，而喺白鴿黨咁多個立法會議員當中，相信最頭痕嘅都係甘乃威嘞！

查實甘威喺○八年立會選舉都係掹車邊當選，本身要競逐連任已經唔易，點知佢舊年年尾仲爆出怒炒女助理醜聞，對佢嘅政治前途殺傷力好大。雖則佢喺扎根多年嘅中西區仍然有唔少死硬「粉絲」，但外界一直有傳唔少覬覦佢個立會議席嘅黨友都想「趁佢病攞佢命」，好似佢黨友馮煒光同副主席「單雞」單仲偕早已報名嚟緊喺港島區出選，單雞早前更高調喺東區開咗個辦事處，話要鞏固黨喺港島區嘅政治力量，令佢哋要搶甘威個位嘅傳言更加不逕而走。

甘威都未搞得掂內憂，外患原來早就殺到。白鴿黨嘅選舉宿敵建仔最近就用銀彈政策，喺中西區分別租咗兩個地舖開辦事處，擺明就係衝住甘威而嚟。建仔呢兩個辦事處嘅面積有白鴿黨大本營咁大，須知地舖租金高昂，建仔可謂不惜工本，而向來出名窮嘅白鴿黨根本負擔唔嚟，建仔呢招真係打到甘威冇還手之力。

勁敵明星化易吸票

四面受敵，甘威故作鎮定，仲話未驚過。佢直言依家港島區嘅勁敵，好似公文袋黨魁余若薇同匯賢智庫葉劉淑儀咁，都趨向明星化，鮮有做地區工作；相反，佢喺中西區「揼石仔」多年，相信自己呢啲地區貢獻有利佢嚟緊嘅區選選情外，亦係佢立會選舉冧莊嘅籌碼。

吓！佢仲喺度死撐？區議會選舉就話靠地區政績啫，立會選舉講求人氣同政治明星吸票，唔通佢以為因怒炒女助理醜聞而「聲名大噪」可以幫佢一把？

甘威又話對上嗰次嘅立會選舉，佢足足借咗五十萬元做選舉工程，每個月攤還三萬銀，上個月先啱啱還晒呢筆長命債。佢話依家啲錢鬆動啲，將會繼續積極開辦事處反擊。佢上個月先啱啱喺上環開咗個新辦事處，嚟緊仲打算進軍建仔票倉灣仔區，睇嚟佢要反撲建仔喎！大家不妨放長雙眼睇吓點。