件事係咁嘅，日前有位內地商人來港購物，光顧尖沙咀一間海味店，合共買咗九千二百元藥材，用信用卡付帳。但係佢返深圳後攞張單據出嚟睇，差啲嚇到暈低，原來有人碌卡時懷疑做咗手腳，將銀碼加多一個零，變咗九萬二千元，但畀佢簽帳嘅時候就用手指住個零。蠱惑手指係咁意一點，大拿拿八萬幾銀就袋袋平安，簡直係許遜上身。唔同嘅係，人哋許遜為民消災，黑店則坑害民眾，一個流芳百世，一個遺臭萬年。叮！

內地商人急急腳返香港報警，警方o依o依哦哦，話唔可以指控海味店詐騙喎，事主惟有去消委會投訴，又因為係周末冇人辦公。唉，開開心心嚟香港購物，被呃咗錢不特止，仲谷住一肚氣。事主直言，原本以為香港係文明社會，店員會好好待客，點知竟然被呃，令佢對香港失晒信心。正所謂哀莫大於心死，你話佢仲會唔會再嚟香港購物吖嗱！

其實，海味店劏客早就唔係新聞。警方同海關早前搜查彌敦道一帶嘅海味店，發現多間違例操作，劏客手法更加係五花八門，有啲喺碌卡時做手腳，亦有用極細字體標價從中博懵。有啲黑店更賤格，未經客人同意就將參茸藥材磨粉切片，令對方無法退貨。難怪有旅遊界立法會議員狂批海味店「仲衰過惡導遊阿珍」，嚴重打擊香港購物天堂美譽。

話時話，香港仲算係購物天堂咩？旅遊業界近排是非多多，違規旅行社同黑店狼狽為奸，一個起勢逼人購物，一個拚命劏客。外地旅客唔買嘢嘅被噴到一面屁，買嘢咯喎，又分分鐘被斬到一頸血。行勻全世界，邊度有咁得人驚嘅購物天堂呀？嗱，連國家旅遊局都發出赴港旅遊服務警示，提醒遊客慎防購物陷阱。講到尾，購物天堂只係得啖笑，劏客天堂先至係實至名歸。叮！

更弊嘅係，港府次次都係賊過興兵，平時翹埋雙手乜都唔做，呢，上次央視踢爆黑店劏客伎倆後，港府就係威係勢做番場掃蕩黑店騷，但係風頭一過，又偃旗息鼓。於是乎，黑店好快又成行成市，劏客功夫更係精益求精，家陣更磨刀霍霍，隨時恭候各方來客。睇嚟國家旅遊局有必要再發一個旅遊警示：凡赴港旅遊者，請自備頸箍！