商界「五虎將」尋晚喺君悅舉行世紀生日派對，齊齊慶祝六十大壽。五個「壽星公」加埋啱啱三百歲，包括身兼富貴黨常委嘅田北辰、德昌電機主席汪穗中、偉易達主席黃子欣、富士攝影器材主席孫大倫同婦科名醫陳煥堂，五人齊以豹紋煲呔Look變身「虎男」，證明男人六十，依然虎虎生威。
田二少太太就嚟個性感突擊，一襲火紅色Tube Dress搶晒鏡。問田太送乜禮物賀老公？未等太太開口，田二少就「搶答」話：「佢送咗半年心血畀我，為我籌備呢個生日派對。」跟住輕搭太太香肩回贈愛的宣言，話送個心畀老婆喎。嚟緊禮拜四係田二少正日生日，咁啱佢要上京開會，好彩有太太上京陪佢。
