仲記得喺立法會審議政改方案當日，鄭家富振振有詞咁話要為市民爭取民主，所以要退黨投反對票，但退咗黨兩個月，佢尋日接受電台訪問時就轉晒口風，話對議會工作有「無力感」，唔可以排除二○一二年唔再參選立法會選舉，認為可以讓位畀更有衝勁嘅人，但即使退落嚟，二○一六年亦可能再參選喎。

先前已經有消息傳佢唔考慮二○一二年競逐連任係為搵真銀，再聽佢尋日親口講出嚟，呢次仲唔係露出狐狸尾巴？咁又係嘅，鄭家富身為律師，做證婚生意做到出晒名，早前就有報道話佢喺今年十月十號呢個結婚熱門日子一共接咗三十單證婚生意，破咗佢自己舊年十一月二十一號單日接二十五單嘅紀錄。若果以佢一單證婚收四千蚊計，一日已經袋十二萬元落袋，咁又使乜咁辛苦嘥咁多時間做議員吖！