啱啱「升呢」做香港崇德社會長嘅霍關天穎（Bonnie），日前相約接任該社公關主席、先施百貨後人馬天惠（Esther）去尖沙咀王子飯店食晏，兩姊妹唔止做善事啱嘴形，對美食嘅要求都好高，當日法國鵝肝沙律同黑松露大蝦球就最得兩位靚女歡心。
王子飯店向以出品精緻著稱，無論係食物質素或用膳環境氣氛，都走高檔路線。Esther嚟自先施大家族，自己又開咗間公關公司，自然識飲識食。當日佢向好姊妹推介王子飯店，第一次幫襯嘅Bonnie都大讚好味。
當日菜式既以粵菜為主，又融入西菜嘅烹調方式，好似法國鵝肝沙律同黑松露大蝦球，亦中亦西。兩位美國加州柏克萊大學嘅師姊妹，一邊食一邊交流未來會務大計，一樂也！
