香港小型足球總會成立六十周年，會長霍啟山尋日搞咗個名人邀請賽，由名人隊對廣州奧組委隊。活動星光熠熠，除一班前甲組球員外，仲邀請到廣州市政協主席林元和同明星足球隊做嘉賓。啟山透露，自細已經跟爺爺霍英東同任足總會長嘅爸爸霍震霆學踢波，之後去英國讀書都冇放棄過呢項興趣，經常睇當地嘅聯賽。現場所見，啟山功架十足，更加為名人隊先開紀錄。
名人隊中仲有科大校長陳繁昌，佢都話由細已經好鍾意踢波，中學時仲做過校隊踢學界賽事，但近年就踢少咗，改為打網球。觀乎陳校長嘅表現寶刀未老，一傳一射都有板有眼，佢賽後話以前係踢中場做校炮手，唔怪得腳法咁好啦！佢囡囡就一直喺場邊打氣，佢笑笑口話囡囡喺外國做傳媒廣告之類嘅工作，今次返港度假，見有時間咪到場睇爸爸表演囉。
名人隊結果以四比一勝出，啟山當然開心，而佢爸爸霍公子尋日全副武裝到場，但最終都冇落場。雖然霍公子只係做觀眾，但都不愁寂寞，因為兩位老友足總主席梁孔德同董事余錦基都有到場，唔知佢哋三個幾時會真正落場踢番兩腳呢？