消息流傳，兩人連選區都揀好，家住彩虹邨嘅屈奇安將出戰附近嘅采頤選區，廖潔明就攻觀塘區，如果區選成績滿意，佢哋更加唔排除喺二○一二年出選立法會。我哋問屈奇安係咪參選區議會，佢承認正考慮之中，廖潔明則話未有決定。紀律部隊人員總工會主席林國豪指出，知道屈奇安有興趣參選區議會，至於一二年立法會選舉則言之尚早，總之屈奇安選唔選都唔係代表總工會出戰。

曾任保安局局長嘅匯賢智庫主席葉劉淑儀承認曾同屈、廖二人談論參選區議會，亦鼓勵佢哋出戰，又指二人有意參選嘅理由，係自○二年公務員減薪，已有感公務員需要參政爭權益，尤其今年初公務員被減薪百分之五點三八，立法會內冇一個政黨願意為佢哋發聲，於是令屈、廖嘅參政決心大大提升。

由於過往較少退休紀律部隊人員殺入直選，令葉劉競奪一二年「超級區議會議席」不脛而走。問及若屈、廖當選區議員，一二年會唔會提名佢參選「超級區議會議席」，佢話雙方冇傾到咁長遠喎！