兩岸於月前簽署《兩岸經濟合作框架協議（ECFA）》，正所謂打鐵趁熱，北京巿政協李鋈麟早前就組織香港各界工商聯台灣工商訪問團訪問台灣四日，獲國民黨榮譽主席連戰接見，亦拜會咗台北市、花蓮縣、台北縣同桃園縣政經要人。李鋈麟向來睇好台灣經濟，所以早喺半年前已經搵定北京巿政協朋友幫忙，安排今次台灣訪問團。
對於ECFA，連戰坦言對台灣好重要，亦係台灣民眾期待已久嘅。連戰形容香港係接觸世界最好嘅地方，加上依家香港政府都喺台灣設立機構促進兩地包括文化、教育、商貿同金融活動，關係就更密切嘞。
李鋈麟就希望台港兩地能加深互動機遇，向對方好客氣咁話台灣中小企業好有活力。另外，做環保同糧產生意嘅李鋈麟，今次去到農產豐富嘅台灣，當然冇錯過去睇吓當地嘅農業技術啦！最近佢哋同可口可樂合作，用粹米轉煉做健康代糖，所以今次去到台灣，佢都特登去睇吓當地嘅種米技術。