自爆約幫主問意見

維園阿哥尋日話已鎖定專攻年輕同中產嘅選民，以配合佢一向嘅形象。咁係咪話佢「80後」憤青嘅形象受落呢？本來佢家住西環，身為「地頭蟲」應該易打啲，點知因為中西區競爭極大，東區亦難打，所以佢極有可能會「空降」新界東同九龍西。佢坦言呢一刻仍然心大心細，有好多顧慮，暫時對揀邊區仲係毫無頭緒，但就自爆已約定該黨「幫主」兼一向對佢特別偏愛嘅黃毓民，下禮拜坐低就區選揀區慢慢傾，等佢畀啲意見，仲賣口乖話好想跟佢學做地區工作添！

近月極速冒起嘅維園阿哥，喺社民連咁多粒新星裏面算係較突出，聽聞佢呢次參選必定要贏取議席，唔似得其他派出嚟玩嘢嘅新星，根本冇諗過要贏，落去撼建制派時可以冇包袱、玩得盡啲。

之不過，唔係話要贏就贏得到，人氣同佢係咪可以攞到席位並唔係對等。一來其他民主派固然唔會主動讓個舊有筍區畀佢；二來喺區選呢個單議席單票制、即係唔可以靠黨內知名人士「一拖一」嘅情況下，純粹喺維園爆出嘅任亮憲，對比起其他真係有做過地區工作嘅人士，地區政績係一張白紙，點夠打吖！

同黨內核心唔咬弦

最慘嘅係，佢同黨內其他核心成員，例如主席陶君行同秘書長季詩傑唔咬弦已唔係啲乜嘢秘密，即使佢揀到區，亦未必得到黨友支持。咁即係話冇碇落腳又死，有碇落腳都死，路路不通，佢唔苦惱先奇。

區議員始終都要扎根社區，單單依靠知名度，要空降任何一區亦絕非易事。睇嚟除非政府劃個「維園區」出嚟畀維園阿哥出選，否則佢都好難坐定粒六、靠佢「維園阿哥」呢個朵食胡。