內地旅客人數無受醜聞影響，係咪因為港府補鑊成功？梗係唔係啦。首先，因為阿爺照住香港，不斷放寬個人遊；其次，因為舊年七月撞正豬流感爆發，旅遊業大受打擊，基數小，所以咪顯得今年增長特別強勁囉。嗱，大家不妨睇吓另一組數據，澳門統計局公布，六月份赴澳團隊旅客比舊年同期增加一點六七倍，其中內地客上升二點一倍，唔怕唔識貨，最怕貨比貨，香港好明顯輸咗九條街啦，叮！

唉，港府淨係識得望天打卦，坐享其成，今年旅客人數就話多咗啫，但香港旅遊業面對內憂外患，點知好景可以維持得幾耐。呢，旅客必到嘅灣仔金紫荊廣場又搞到烏煙瘴氣啦，一班南亞裔騙徒專向旅客埋手，聲稱為家鄉嘅貧窮嬰兒籌奶粉錢，纏住旅客索取「捐款」。有人睇唔過眼，多次報警，但警方就話到場後冇發現犯罪活動喎。

其實，所謂冇發現犯罪活動，擺明又係卸膊嘅藉口。本報記者根據市民報料，話咁易就直擊咗整個行騙過程。原來，呢班南亞裔「奶粉黨」識講英文、廣東話同普通話，佢哋用嬰兒照片博取旅客同情，「募捐」時為對方貼上心形貼紙，得手後又邀請旅客簽名留念，每日「收工」後就轉往尖沙咀瓜分「善款」，各自行街shopping。

講真啦，呢種詐騙行為屢見不鮮，早就唔係新聞啦。咁多年嚟，假乞兒、假和尚喺香港遍地開花，但係當局一直闊佬懶理，任得佢哋滋擾市民同旅客。查實，正如立法會議員話齋，當局只要派人放蛇，就可以將騙徒一網打盡。講到尾，對於打擊街頭騙案，當局絕對唔係冇辦法，只係懶得就懶，唔想做嘢啫，叮！

當局隻眼開隻眼閉，不法分子唔乘虛而入就笨啦。招搖撞騙都未算誇張，半山司徒拔道瞭望台最近有一班惡霸橫行，長期霸佔靚位幫人影相，趕走唔肯幫襯嘅旅客，郁手郁腳，仲用粗口鬧人，卒之又係要等到傳媒揭發，當局至後知後覺派人掃蕩。唉，你估旅客遇着咁嘅事，會點睇香港呢？

咪話太一叮唔提醒，內地同台灣傾緊赴台個人遊，好可能今年成事，內地旅客嘅選擇愈來愈多，香港旅遊業嘅好景唔係必然，當局再唔搞掂旅遊業嘅亂象，遲早冇運行！