政府以高薪聘用十八名副局政助，但佢哋表現不濟屢爆醜聞，政府決定唔使佢哋減薪，只係一刀切凍薪，搞到全城鬧爆。專業會議尋日就施政報告向政府提交建議時，就叫政府研究係咪繼續保留政助職位。據聞，政府仲死撐話三層委任層級相對外國嘅官僚體制已算精簡，又唔認同班政助唔值每月攞十幾萬蚊，即係政助仲有排玩。與會嘅梁美芬大膽提議，政助唔取消，不如改名啦，正名叫「助理局長」，提升權責同能力要求。聽起上嚟，總好過政府每月用百幾萬元請「助理」吖。
副局政助唔單止成為政府負資產，亦係某啲建制派政黨嘅負資產，就算有三個黨員做副局同政助嘅建制派嘅建仔都叫政府考慮係咪撤銷呢啲職位喇，依家專業會議仲幫手諗橋拆彈，係咪多此一舉呢？
再講，叫政助改名，等如迷信改名轉運，唔通真係換個名就風生水起咩？嘥氣！