由立法會廠商會代表林大輝牽頭嘅社區組織「C18」尋日展開台灣之旅，一行廿幾人去高雄同台北，同各市市長選舉候選人見面，交流吓選舉策略同經濟發展嘅意見，但睇嚟佢哋似係去偷師多啲。
C18一行人尋日朝早九點啟程飛去高雄，先去當地市議會同高雄最年輕嘅市議員藍健菖見面，交流下年輕人參政嘅好與壞。之後佢哋就同國民黨高雄市市長候選人黃昭順會面，討論選舉工程同經濟等議題，大輝仲喺呢短短一個鐘度成功偷師添！
大輝話黃昭順有個外號，叫「鐵的康乃馨」，因為佢既有柔情又有堅毅嘅一面，佢盛讚黃昭順嘅宣傳短片好溫馨，因為佢為咗表現自己剛中帶柔，專登搵咗囡囡幫手拍宣傳廣告，由囡囡嘅角度講番阿媽嘅從政精神，短短兩三分鐘就已經深入民心！不過香港電子傳媒仲未可以播政治廣告，如果大輝想將台灣呢套宣傳手法放喺香港用，睇嚟要先爭取修例先得嘞！