本文重點
二十二位國際御廚旋風式訪港四日，眾所周知香港係美食天堂，御廚喺訪港期間連環出擊，橫掃尖沙咀同銅鑼灣星級食肆。
靚太兩分鐘掃水晶耳環
國際御廚同「鮑魚大王」、「阿一」楊貫一淵源深，阿一喺○九年獲該協會選為「御廚中的御廚」。廚界老友來港，阿一前晚喺有份投資嘅八重菊設宴，請一眾廚神勁擦新鮮特級拖羅、藍鰭金䱽魚、油甘魚、極品日本白梅貝等。
食完刺身，跟住再拉隊去阿一嘅富臨飯店食晚飯。臨上大巴前，摩納哥阿爾貝二世親王御廚Christian Garcia嘅太太
到iSquare商場內有間希臘品牌首飾店Oxette，一個箭步衝上前買水晶耳環。
Garcia見大隊已經上晒車，惟有施軟功催促太太快啲走人，不過女人一向買嘢大過天，一於速戰速決，用兩分鐘時間扑錘購入一對球形白水晶耳環，畀錢時笑唔停，十足尋到寶咁興奮！
原來有啲御廚係初次來港，所以玩得特別投入，當抵達銅鑼灣富臨門外，拿拿臨影番張「到此一遊」合照，其中一位御廚更趴喺地上扮做掌上壓，氹到眾人哈哈大笑。
阿一擺咗六圍，請班御廚同家屬食飯，菜式包括廿八頭鮑魚、當紅炸子雞、豉油皇焗中蝦、釀焗蟹蓋等。
要煮餸招呼咁多位超級廚神，阿一有乜壓力先？見慣大場面嘅阿一就淡淡定咁話：「好輕鬆，唔緊張。」唯一要注意嘅就係，外國廚神一向重視環保，唔食魚翅，所以阿一冇預呢味菜。