政府喺上星期嘅「黑色星期五」主動引爆連串負面新聞，先有副局長政治助理嘅薪酬檢討結果，再公布港台顧問委員會名單，財爺鬍鬚曾仲要修訂全年嘅經濟增長預測同提出新嘅打擊樓價措施，搞到記者做到冇停手，政府新聞處一班職員收查詢電話都聽到手軟。
雖然手下忙到爆，但有份設計呢次「煙幕」嘅新聞處處長Michael黃偉綸竟由十五號起放假近一個月，下個月十日先正式返工，避開「黑色星期五」餘波，認真識閃，但就做死呢段時間幫佢署任嘅兩位副處長嘞。
通常立法會休會呢兩個月，都係議員高官嘅放假黃金時期，之不過高官有嘢唔做放假抖暑，Michael都唔係第一個。早前搞停車熄匙立法搞到滿城風雨、保護大浪西灣又無功而還嘅環境局局長邱騰華，都施施然放一個月假，惹嚟各界不滿。前車可鑑，今次Michael都唔放少幾日，小心一復工就畀人圍攻喎！