二○一二年立法會選舉，焦點肯定係由全港三百萬選民定勝負嘅五個「超級議席」，各黨積極備戰，矢言大舉進軍直選嘅工聯會又點會輕輕放過？據悉，工聯會內部已展開猛烈游說攻勢，希望說服做過「票后」嘅陳婉嫻出山，幫工聯會取下一席超級議席。但嫻姐自○八年淡出立法會後，一直深居簡出，佢到底點諗，外界不得而知，只可以估估吓。
嫻姐嘅參選謎團尋日親自解開。近兩年已絕迹施政報告諮詢會嘅嫻姐，突然現身政府總部，心情好靚。嫻姐話工聯會想搵一個受過直選洗禮嘅人，出戰超級區議會議席，工會內、地區上嘅好友，都不停有人游說佢出山！
被記者連番追問係咪參選，雖然佢話享受現時嘅工作，又話完全冇諗過去落場參選明年區議會，但斬釘截鐵再問佢係唔係唔會考慮參選時，佢就選擇唔答，仲捉住一名女記者，話授權畀佢作答喎！態度相當扭擰，即係冇封死後門喇！