暗嘲馮程管理亂龍

香港係石屎森林，更被嘲諷香港嘅草地好矜貴。可能因為咁，所以政府興建嘅公園都要特別保護，康文署對公園管理諸多限制，乜都禁制唔准做，早就畀市民鬧爆矯枉過正，本來家醜不出外傳，點知尋日又畀人暗寸喎！

話說西九文化區管理局尋日大鑼大鼓咁公布三份設計，仲請埋相關嘅國際知名設計師當場講解添。三份設計圖都大講綠化，但到咗由Mr.Rem Koolhass（雷姆．庫哈斯）講解佢嗰份名為「文化　新尺度」設計時，呢個設計都係講究綠化，但佢即時展示咗一幅圖，當堂令人嚇咗一跳。

點解？呢幅圖裏面嘅下半部列出十幾廿個標誌，全部都係有關香港公園禁止進行嘅活動，當中只有一個例外，就係可以丟垃圾落垃圾箱。庫哈斯話，香港嘅公園有好多限制，唔准踩草、唔准放風箏、唔准放狗、唔准瞓低等等，但係喺佢設計嘅西九文化區，就乜都可以做，喺呢啲標示禁止嘅紅圈全部變晒綠色。

庫哈斯冇指名道姓，唔知佢係咪暗寸康文署管理公園嘅方法有錯呢？咁康文署署長Betty馮程淑儀聽到佢咁講，都應該意識到存在乜嘢問題喇！

好似坐監擺明趕客

當然，喺公園煲蠟、斬樹呢啲破壞環境嘅行為梗係絕對要禁止啦，但唔係乜都禁制，好似坐監咁點得㗎，點會吸引到啲年輕人同一家人去親子樂吖。

既然庫哈斯咁清楚香港啲公園乜都禁，點解仲提出呢啲全面開放嘅建議呢？好簡單啫，西九文化區係由西九管理局管理，唔係由康文署囉！唉！既然連國際設計師都有意見嘅話，政府點可以一味按本子辦事，Betty快啲攝高枕頭諗下點「解放」公園，方便公眾把喇！