降尿酸藥「別嘌醇」含毛霉菌醫療事故死因研訊尋日裁決，八名癌症病人入面，死因庭指其中三人因感染毛霉菌致死，係死於不幸，兩人被裁定死因存疑，其他三人屬死於自然。

「死於不幸」即係啲藥物確實有問題，係咪好得人驚呢？裁判官要求政府加強對製藥業嘅監管同執法，希望食衞局、衞生署、醫管局同藥廠跟進，避免慘劇重演。

瑪麗醫院舊年年初喺癌症病人腸道發現感染毛霉菌，開頭懷疑便利店賣嘅食物或者木筷子係「殺手」，後來至驗出別嘌醇至係「真兇」。原來藥廠將別嘌醇半製成品儲存五日至十四日不等，令毛霉菌大量孳生。

微生物專家袁國勇喺死因庭作供時話，呢次係醫學史上首次喺血癌及骨髓移植病人身上，出現腸道感染毛霉菌大爆發。有死者家屬控訴衞生署及醫管局冇為藥物做安全檢測，搞到「活生生嘅人體都發霉」。表面睇係藥廠出問題，但衞生署監管失職，同幫兇冇乜分別！

呢次慘劇唔止係製藥業之恥，更係香港之恥！弊在當局根本冇吸取血的教訓，藥物監管繼續甩漏不特止，連亡羊補牢都做到一鑊泡。話就話要重視藥物安全，其實統統係齋噏。

嗱，別嘌醇事件之後，本港屢爆藥物安全醜聞，但當局鋪鋪都反應慢九拍。最典型嘅係，百年老字號「保濟丸」部分產品含致癌西藥同減肥藥，如果唔係新加坡驗出，港府睇怕依家仲烏吓烏吓。另一家藥廠嘅止痛藥喺澳門驗出有問題，澳門即時回收有關產品，港府拖足半個月至發出回收令，簡直係草菅人命。

唔止西藥出問題，中藥亦相繼淪陷，全港三百幾間「過渡性領牌中成藥製造商」入面，至少有幾十間被踢爆「廠址」居然喺住宅大廈，甚至包括居屋。仲有呀，舊年上半年數字顯示，有四成藥品批發商同四成七進出口商，超過一年時間未被衞生署巡查過，咁嘅「監管」，唔出人命至奇！

別嘌醇事件後，當局提出七十幾項「改善建議」，但藥物安全事故依然陸續發生，除咗發霉藥，仲有過期藥、未註冊藥，五花八門乜都有。難怪早排立法會政府帳目委員會一致決定，對衞生署署長林秉恩提出譴責啦。

毛霉菌別嘌醇導致病人死於不幸，計太一叮話齋，不幸嘅仲有七百萬港人。本來攞嚟治病救人嘅藥，居然變成「殺人兇器」，特衰政府果然夠「創意」。叮！