目標世界各地有分店
「鬼妹仔」譚筠怡（Gwennie）淡出娛樂圈已有一段日子，原來她轉投商界。○三年，她在澳門與朋友夾份開設珠寶店，成績不俗，去年底決定自資七位數字資金，在中環雲咸街開設樓上舖「Gwennie Tam Fine Jewellery」，售賣自己設計的珠寶鑽飾：「開樓上舖可減輕租金成本，開業至今生意唔錯，我嘅目標係世界各地都有分店！」
Gwennie對生意十分着緊，除了不斷逛珠寶展買「石」外，店舖的裝修設計全是她的主意，甚至編寫公司網頁和拍攝Catalogue相片，都由她親自操刀，絕不假手於人。
她售賣的首飾，售價由數千至數百萬元，每款設計只有少量生產，亦提供度身訂造服務。最受歡迎是以「葉」做題材的玫瑰金鑽飾指環，但她做生意甚有原則：「有客人想買嚟做結婚戒指，但葉嘅英文（Leaves）有離開嘅意思，我覺得唔好意頭，所以拒絕咗，朋友都話我傻，有生意都唔做，但我覺得結婚要長長久久先好，寧願賺少啲囉！」
Gwennie○四年開始修讀全日制GIA寶石和鑽石鑑定、珠寶行業工商管理、電腦珠寶設計、手畫珠寶設計及珍珠珠寶設計等課程。記者看過她的手畫珠寶圖，畫功非常精細，足見她下過苦功：「我每個設計都要畫到最好，最高紀錄試過連續畫十五個鐘！」
奪獎證明唔係玩玩吓
努力沒有白費，她設計的「澳寶鯨魚頸鏈」，去年在國際性的澳洲珠寶設計大賽（IOJDAA）摘下所屬組別第三名及評判眼中專業大獎；她以秦始皇為題的白金鑽戒，在多達一千五百件作品參賽的泰國國際賽（TIJA）中打進前三十名，入了準決賽。她雀躍道：「獲得肯定真係好開心，可以證明畀人睇，我唔係玩玩吓！」
譚筠怡小檔案
年齡：35歲
專業資格：
Gemological Institute Of America（GIA）寶石及鑽石鑑定、珠寶行業工商管理、電腦珠寶設計、手畫珠寶設計及珍珠珠寶設計文憑
現職：Gwennie Tam Fine Jewellery老闆
興趣：珠寶設計、旅行、賽車、運動