立法會尋日召開特別財委會通過撥款賑災，經濟動力嘅議員林健鋒（Jeffrey，圖）喺發言時，首先話「丹曲」縣仍有好多人失蹤，當一眾議員都笑佢講錯地方名之時，佢再下一城，話「曲丹」縣災情緊急，好需要大家協助。
將舟曲縣講成「丹曲」縣，勉強可以解釋話睇漏咗「舟」字嘅一點，但讀成「曲丹」真係有啲離譜，搞到財委會主席劉慧卿都忍唔住狠狠咁寸佢：「林議員，『舟曲』係咪呀？咩『丹曲』呀？你講緊邊度呀？」最後Jeffrey停頓咗幾秒，先意會到讀錯字。
Jeffrey事後解釋，讀錯係因為佢部iPad出嘅字唔清楚，仲話：「我唔係讀錯，係睇漏一點啫，你估我真係唔識讀咩！」吓！咁都有得賴？其實大家唔係話佢讀錯字，只係質疑佢唔關心災情啫！