棠哥建議，一二年將九龍東同九龍西合併做一個大區，另外將新界西嘅離島區撥歸港島，其餘劃界不變。依呢個比例，港島區將佔七席，九龍區十席，新界東、西各九席。棠哥話咁分法可以縮細各區議席數目嘅差距，當選議員所得「票值」又比較接近，仲可以令細政黨同獨立人士有更大嘅參選空間，好似好處一籮籮咁。

諗真啲，呢個建議完全係為工聯會度身訂造，依照棠哥嘅分法，工聯會就好大機會攞足五席做大贏家。首先，東涌有唔少屋邨，人口多之餘，大部分係基層市民，加上現任議員王國興喺東涌落咗唔少工夫，如果離島區撥入港島，分分鐘工聯會可以喺港島鍊贏一席。

九龍東一向係工聯會票倉，上屆工聯會骨幹陳婉嫻同黃國健拎咗五萬幾票，加埋九龍西嘅人口，唔使再攞太多票，穩奪兩席唔難。新界東同新界西都係基層市民眾多，王國興已喺新界西殺出血路，若下屆唔再幫人抬轎，一直幫打工仔發聲嘅工聯會要喺新界東攞一席，亦應該沒問題。只不過棠哥嘅建議其他政團受唔受，就要睇過至知嘞！